PR No.24/2024-2025.
Lawngtlai July 10, 2024 : Vawiin chawhma dar 10:30AM hian, 11th Lai Autonomous District Council Emergency Session ni nga(5) awh tur chu neih chhunzawm zel a ni.
Pu VL. Hmuaka, Chairman LADC kaihruaina hnuaiah Session hi neih chhunzawm leh a ni a, Pu CL. Lianzuala, Deputy Chairman LADC chuan, Dt. 8.7.2024 Session tan niah banna (Resignation) a submit chu pawm a nih avangin, Deputy Chairman thar chu vawiin Session-ah hian thlan a ni.
Deputy Chairman LADC Nomination file hun chhung hawn a ni a, hun hawn chhungin, Pu H.Lalmuansanga, MDC, Tuithumhnar Constituency atanga thlan tlin chauhin, Nomination a file avangin, Pu VL. Hmuaka, Chairman, Lai Autonomous District Council chuan, Pu H. Lalmuansanga chu tlingah a puang a ni.
Pu C. Lalmuanthanga, CEM LADC chuan, lawmpuina leh duhsakna thu sawiin, "Pu H. Lalmuansanga, MDC chu, mithiam leh a ngaihna hria, inzirmi-tak a ni a, he house kaihruaina kawngah pawh felfai takin min kaihruai theiin ka ringa, a thlamuan thlak tak zet a ni. Vawiin a Deputy Chairman thar duhawm tak LADC in kan nei thei hi a lawmawm tak zeta, akal zelna turah duhsakna ka hlan bawk a ni", a ti.
Pu H. Lalmuansanga, Deputy Chairman thlan thar pawhin thusawina hun neiin, "He house zahawm takah hian, he hna zahawm leh chanvo pawimawh tak chelh tura,kan hotu te'n min thlang hi ka lawm em em rualin a huphurhawm hle bawka, tisual palh thei kan ni a, chuvangin ka thawhpui member zawng zawng te'n, min finchhuaha thurawn min pe thin turin ka ngen duh bawk che u a ni, kan ram leh hnam tan hian rinawm tak leh taima takin rorel ila, kan dan neihte zahthiam takin, dan hnuaiah ro i relho thin ang u, atawp berah chuan, he dinhmun ka thlen theihna tur min thlang tlingtu, Tuithumhnar Constituency mipuite chungah pawh ka lawm tak zet a ni", a ti.
Pu H.Lalmuansanga Deputy Chairman thlan thar hian, Session neih zawh hian room aluah nghal.
Pu VL. Hmuaka, Chairman chuan, vawiin atan business zo fel anih avangin, Dt. 11.7.2024 chawhma dar 10;30 AM-ah Session hi chhunzawm leh turin ati tawp a ni.
Written & Published by; I & PR Department LADC Lawngtlai
