46th YLA DAY i Pu T. Zakunga, Chief Executive Member LADC Biacah
23rd September, Cawn Nithum, 2020
Can tawite bantuk i kan ruah lio lengmangah kan Lairam chung i Ngaknu Tlangval hna i funtawmnak Bu ngancem YLA Day vawi 46 nak cu kan phan hoi cang. Hi Ni sunglawi hi Miphun tling i a kan sertu kan Pathian nih Laimi hna a kan dawtnak le a kan hramhnak ruang i lawm kho tawn kan si caah a min cu thangthatin um ko seh. Covid 19 Hri rai a len ruangah kumdang bantukin lawm kho lo hmanh usilaw, Laimi thinlungah cun hi Ni hi philh khawh a si bal lai lo. Kan ram le miphun ca i derh mi, kan cozah le Krihfa Bu hna tiangin tampi i kan i hngauhchan mi bu, YLA hi Laimi paoh paoh thinlungah cun fakpiin dawtnak le i tlaihchannak a um. Cu caah cun hi Ni sunglawiah hin YLA member pinah Lairam chung le leng lei i Laimi vialte hna kut kan tlaih hna.
YLA cu bomhchanh hau mi bawmtu a sinak hi vawi tampi langhter a rak si cang. Mi sifak le mirum thleidang loin, miphun dang hna lak zongah rian tampi a rak tuan cang ti kan theih. Khuatlang le mipi thatnak ding i riantuantu a si caah miphun dang le bu dang hna ca zongah zohchunh awktlak a si ngai mi a si.
Rih khawh thil le kan mipi ca i tha lo mi hna doh kongah YLA tluk i rian a tuan mi an um lo. Hi kongah hin kan Lairam caah cun thiannak le daihnak a umkhawhnak ding i tuantu kan i bochan ngaimi zong a si. Hi nih hin ngandamnak lei zongah hmai a kan sakpiak i, hi pin leiah kan pumsa ngandamnak le kan khuatlang i hri rai hna a tlau khawhnak hnga YLA nih hin tu nak fak hin rian tuan rih selaw ka duh ngai mi a si. Kan khuatlang le ram mipi hna ngan a dam i hri rai lak i kan thianah cun development kan timi hi tlamtling tein kan hmuh ko lai. YLA member kip hna cu ngandamnak lei i mipi cawnpiaktu le lamhmuhtu si tim cio hna usih.
Thing le mau, saramle va, tiva nga hna tiang hin kan ramah humhak an hau cang. Cu kongah cun YLA nih hin fakpiin rian a rak tuan tawn i, kan ram thing hna mi ramdang lei i a kal ding ven le humhak kongah an riantuan hna hlorh a phu ngamsam ka ti. Kan ram dawhtertu, boruak thiang le ti thiang a kan petu, kan thing le mau hna humhak pinah kan ram chung i zalong te i saram le va hna an um khawhnak ding le kan tiva nga hna tur le thildang i hrai an si lobak ding hna, mi ramdang i um ve lo mi kan ram i um tung mi saram le va hna hi fakpi i humhak an cu tuk cang. Hi kongah hin Cozah tuanpi i kan ram le miphun humhak kongah tu nak fak i YLA kan cawl a hau cang. Thetse ram bantuk i kan chuah hlanah YLA member kip nih mipi lakah cawnpiaknak le humhak a herhnak tampi le fakpii kan cawnpiak zong a herh tuk cang. Kan tu le fa hna zong nih nuam le dawh te i kan ram hi an luah khawh zel nak ding cun tu thokin kan tuan a hau. Hram kan thok cang i, fak chinin tuan zungzal a hau ko. Lairam lo cu ramdang kan neih lo caah kan ram hi a chung ummi vialte hna he hin kan dawtchih a hau ko.
YLA member vialte nih YLA Day hi lunglawm thanuam te i nan hman khawh cio ka duh i, Lairam chung lawng si loin Ram leng lei i Laimi hna he zong, tu nak fak hin i pehtlaihnak le i dawtnak nei dingin teirial le thahnem ngai tein tuan cio hna usih.
'LAIRAM le LAI MIPHUN caah Young Lai Association par chin zungzal seh'
