5th MIZORAM STATE ANTI-TOBACCO DAY PU LALTLAWMLOVA CHINZAH IN A HMANPUI
Mizoram State Tobacco Control Society buatsaih, ‘5th Mizoram State Anti-tobacco Day’ chu vawiin September ni 11 khan DC Conference Hall, Lawngtlai ah hman ani. He hun hi Chairman Pu Lalsanglura SDC an kaihruaiin Pu Laltlawmlova Chinzah, Executive Member, i/c Education (M/S), LADC chuan Khuallian niin hun hi a hmanpui ani.
Khuallian Pu Laltlawmlova Chinzah chuan thu sawiin, Mizoram chu India ram mai nilova, khawlvel huap ang pawhin zuk leh hmuam ti nasa ram leh zuk leh hmuam kaihhnawih avanga cancer thlenna ram langsar ber pawl ani tawh tih sawiin zuk leh hmuam chu mihring nun titawitu mai bakah mahni nun leh chhungkua tibuaitu ani tih a sawia, kalkhawmte chu zuk leh hmuam laka fihlim tum turin a chah bawk ani. A sawizelna ah puitling zawkte chu naupangten an entawn turte an ni a, zirtirtu leh zirlaite pawh hemi lama tan la turin a fuih a, zuk leh hmuam hian mahni taksa a eiral mai bakah natna thalo tak tak thehdarhna kawngah nasa takin a puih ani ati a, vawiina NGO leh Sakhaw hruaitu kalkhawmte pawh an theihna zawn apianga tan la thar turin a chah a, Zirtirtute ngat phei chu an zirlaite hmuhah ualau taka zuk leh hmuam ti thinlo turin a chah bawk ani.
Hemi ni ah hian ‘Activities under Early Intervention against Tobacco & Drug Abuse’ chu powerpoint hmanga presentation ngaihthlak niin kumina anti-tobacco day theme ‘Inchhung leh Lirthei chhunga mei zuk loh’ tih chu Dr Christine Chhuanmawiin sawizauvin ngaihthlak ani a, anti-tobacco essay writing competition lawmman sem niin zuk leh hmuam tihlohna school ah Adventist English School chu thlan niin zuk leh hmuam tilo zirtirtu tamna ber school atan JNV Sihtlangpui chu thlan ani.
Hemi hnu hian March 2017 atanga March 2018 chhunga Anti-Tobacco Squad ten zuk leh hmuam zawrh leh hralh phalloh an mankhawmte (contraband cigarettes leh gutkha) te chu Khuallian Pu Laltlawmlova Chinzah chuan tui leihin a tiral ani.
