Lawngtlai. September, ni 30, 2020 (Nilaini):- Lai Autonomous District Council-a Adviser to Chief Executive Member thar atan Pu TT. Nohmung lakluh ani.
Pu K. Vanlalsanga Adviser to CEM chuan Executive Member nihna a chelh tak avangin Executive Committee fuke kim lova Sorkar rorelna kalpui a rem ta lova, Adviser to CEM thar lakna order hi LADC GAD chuan ni 28 September 2020 khan a tichhuak ani. Adviser thar hi inkhawm huntawi neiin a Office Chamber thar-ah vawiin khan Chief Executive Member Pu T. Zakunga chuan a lawmlut.
Lakluhna hunah hian Chief Executive Member chuan Sorkar term dinglai chu inthlan hnai tawhin huntam awm tawhlo mah se Sorkar fuke kim lova kal chu a remloh avangin party leh hotute ruahmanna angin hetiang hian remsiam ani ati a, Pu TT. Nohmung chu kum upa lam tawh ni mah se mahni hna-a tui tak leh theihtawp chhuah thin ani tiin, Sorkar inrelbawlna ah pawh mi tangkai tak ani chhunzawm zel dawn ani ati. CEM chuan hun rei awm tawhlo mah se Executive office holders te chu Ram leh Hnam tana theihtawp chhuah zel turin a chah bawka, mipui leh Ram tana rilru kan pek phawt chuan hma kan sawn zel ang tiin rinawm taka thawk turin a chah ani.
Adviser to CEM thar Pu TT. Nohmung chuan thutawi sawiin hetiang hi a rinphak ngailoh thu a sawia, amaherawhchu a kova a tlak takah chuan theihtawpin a phak tawk ahna thar hi thawh a tum thu a sawi. Ram leh Hnam dinchhuah leh humhalh na atana pawimawh leh a vei em em chu Tawng leh Hnam ziarang humhalh hi ani tiin, District Council kan neih theih nachhan pawh hei hi ani a, kan vanneihzia hrechhuak thara hlut lehzual turin amah lawmpui tura kalkhawmte a chah bawk ani.
Sorkar leh party thawhhona pawimawhzia sawiin, thawhhona a that phawt chuan Sorkar a chakin hmasawnna a awm thin ani tiin, Adviser thar chu a lawmpui thu Pu J. Ropianga, President, Lai District Congress Committe chuan a sawi bawk. He hunah hian Rev Lalsawmliana District Treasurer, UPC (NEI) chuan hunserh hmangin office holders te an tel tha hle ani.
Pu TT. Nohmung hi Pawi District Council-a Chairman hmasa ber niin kum 1973 khan Sangau Bial atangin thlantlin hemi hnu hian Executive Member pawh lo ni tawh ani.
Written by
Collins Ngurnunchhunga
AIPRO
