DM&R LADC-IN SANITIZER LEH MASK AN SEM
Lawngtlai, Thawhtanni. August ni 24, 2020:- Lai Autonomous District Council hnuaia Disaster Management & Rehabilitation Department chuan LADC Secretariat leh office hrang hrang ahte CoViD-19 dona atana hmalaknan vawiin khan sanitizer litre sawmnga (50 litres) chuang leh mask thahnemtak an sem. Nodal Officer for DM&R Pu Thathluna Chinzah chuan hei hi 1st Phase chauh anih avangin a tamzawk sem belh tura ruahmanna kalpui mek ani ati.
DM&R LADC chuan thawktu leh mipuite chu kan hnathawhna leh pawnchhuahna ahte fimkhur lehzual turin a chah a, mask vuah uar lehzual turin leh social distancing ngaipawimawh tur te, khawlaia chil chhak lo turin leh damlohna nei te chu mahni In lama in enkawl lova Damdawiin pan vat thin turin a ngen a, tul bik leh loh theihlohvah chuan pungkhawm lo turin leh chhungkaw hrang hrang te pawh inlenpawh loh turin a ngen a, zirlai naupang home assignment submit tur te pawh fimkhur tak leh inhlat deuha awm turin an chah ani.
DM&R hotute chuan LADC hian District Council chhung bika thawktute himna tur thermal scanner hmanga in check na turte ruahman mek anih thu sawiin, inkaihhruaina tur engemawzat a duangchhuaka, hei hi pawmpui turin General Administration & Control Department-ah a thawn tawh ani an ti.
Written by
Collins Ngurnunchhunga
AIPRO
