EK PAIHNA LEH SAWNGBAWLNA CHUNGCHANGAH MEETING NEIH ANI

Nilaini, February Ni 17, 2021:- Vawiin khan Lawngtlai khawpui ina a mamawh em em Ek paihna mumal  leh a sawngbawl dan tur chungchangah Pu T. Lalengmuana Executive Member i/c Local Administration Department leh Lawngtlai District Village Council Association (LDVCA) hruaitute’n inkawmhona an nei.

He inkawmhona ah hian meeting Chairman Pu J. Zahlira, Local Administrative Officer chuan thu sawiin 15^th Finance Commission atanga grant hmuh za-a sawmhnih-panga (25%) chu sanitation tan ani, faina leh thianghlima kawnga mumal leh tha lehzuala hmalak tum ani tiin hemi kawnga hmasawnna hnathawh kalpui turin V/C Association hruaitu kalkhawmte chu a sawm ani.

Executive Member i/c LAD Pu T. Lalengmuana chuan thu sawiin Village Council hruaitute nena thawhhona tha tak an nei chu lawmawm ati a, harsatna kan nei anih pawhin inpawhho taka sawi hova infinchhuah thin turin a sawm. He hunah hian V/C Association hruaitute pawhin ek paihna leh paihdan chungchanga harsatna an tawh thin te sawiho niin Multi-modal kawngkama ek paih an awm thin te leh hei hian kan ei leh intur tui thlengin a tibawlhhlawh theiin kan hriselna atan pawh a pawi thei ani an ti a, an ngaihmawh thu an sawiin, mumal zawka hemi kawnga hmalak dan tur Executive Member hovin an sawiho.

He hunah hian Executive Member i/c Sanitation changtu Pu Glory Lalropuia Chinzah leh Sanitation Officer Pu C. Lalhmunsiama te an telin Er. Malsawmtluanga Hlawnchhing, Assistant Engineer (PHE) in PowerPoint-presentation hmangin sawifiahna a pe bawk ani.


Written by
Collins Ngurnunchhunga
AIPRO