EXECUTIVE MEMBER i/c EDUCATION (P/S) LEH PSTA HRUAITUTE AN INKAWM. Zirtawpni, February ni 5, 2021:- Vawiin khan Lai Autonomous District Council-a Zirna changtu Education Executive Member (P/S) Pu Sanghuliana Mualchin leh LADC-hnuaia Primary School Teachers’ Association (PSTA) hruaituten inkawmhona an nei.
Vawiina Executive Member office chamber-a inkawmhona ah hian PSTA Hotute chuan Executive Member chu lawmpuina hlanin Ram leh Hnamin zirna kawng atana a hmalakna tur kawng chi hrang hrangah duhsakna an hlan ani. PSTA Hotute chuan Executive Member hnenah hian an mamawh zualpui chi hrang hrang – M/R Bill chhuak tlai thin te, Sikula white-board leh projector te hman ve tawh nise, Sikul tinah computer te neih ve nise, hemi mai bakah hian an service chungchanga Zirtirtute grade tun aia mumal lehzuala inkhaidiat dan kalpui anih theihna tur te, Zirtirtute’n study-tour an neih ve theihna turte leh selection grade te arrear tang thin te pawh a hma thei anga pek nise tih an thlen ani.
Executive Member chuan an dilna zawng zawngte chu tun thut thuta tihhlawhtlin nghal theih anihloh pawhin, a tul ang zela chak hma laksak tum ani ang tiin heng an mamawh an thlen te pawh hi Chief Executive Member pawhin a ngaipawimawh hle ani ati a, CoVID19 avanga zirna a chawlh thuap avangin Sikul In thenkhat lo ram te pawh a theih ang anga thawmthar turin sorkar in hma ala ani ati. Ram in zirna kawnga kan dinhmun hrechiang berte chu a hmunah ngei, a hla emaw a hnai emaw, mahni hna a chiang tak leh rinawm taka thawktu Zirtirtute an ni tih sawiin Zirtirtute chu fakawm ati a, Ram hmasawnna kawnga pawimawh berte zingah ami ati.
Posting & Transfer chungchang sawiin Executive Member chuan loh theihlohvin insiamrem ngai a awm thin ani tih sawiin, Sorkar-a kan lut tawh anih chuan mahni duh duhna hmuna awm leh beisei a rem thin lova, hei hi Education Department-ah chauh ni lovin Department dang tamtakaha pawh hetiang dinhmun hi a awm ani ati a, tlawmngai tak leh dawhthei taka Sorkar hmalakna leh remruatna te hrethiama zawm hram hram turin a kalkhawmte a chah bawk ani.
Executive Member i/c Education Pu Sanghuliana Mualchin chuan thawhhona tha in Ram leh Hnam hmasawnna a thlen thin ani tiin, kan tih theih chu tlemte mah ni se Pathian hnena inhlan leh amaha rinna nghat chungin Ram leh Hnam hmasawnna atana theihtawp kan chhuah hova kan tangtlang tlat anih chuan kan Lairam leh Hnam hian hma a sawn ngei ang ati.
Written & published by Collins Ngurnunchhunga AIPRO
Post ID 05-02-2021-1400
