EXECUTIVE MEMBER THAR LADC-AH LAKLUH ANI

Lawngtlai. July ni 7, 2020 (Zirtawpni):- Lai Autonomous District Council-a Executive Member thar vawiin khan lakluh ani.

Mizoram Governor in July ni 22-a Executive Member dinhmun ruak hnawhkhat tura phalna a pek bawhzuiin leh The LADC (CCB)  Rules 2010-in thuneihna a pek hmangin CEM chuan recommendation a siam a, hemi ang hian Executive Member thar hi lakluh ani. Executive Member thar lakluhna hi vawiin chawhma khan Lawngtlai Bawrhsap Conference Hall-ah neih ani a, Lawngtlai Bawrhsap Dr. Andrew H. Vanlaldika chuan Governor aiawha thutiam laktirin 10th Lai Autonomous District Council-a Executive Member ni turin Pu K. Vanlalsanga chu a lalut. Pu K. Vanlalsanga hi Bualpui (Ng) East Constituency atanga thlantlin niin Executive Member anih hma hian Adviser to Chief Executive Member office a chelh ani. 

Hemi hnu hian Pu K. Vanlalsanga chuan LADC Executive Secretariat-a a Office thar a luahlut nghala,Office thar luahna ah hun tawi te hman niin Chief Executive Member Pu T. Zakunga chuan Sorkar dinglai term laklawh viau mah se Department pawimawh tak tak engemawzat enkawl ngai a awm avangin leh Sorkar inrelbawlna a bahlah lohnan hetiang hian ruahmanna siam anih thu a sawi a, Executive Member thar chu ram leh mipui tana rinawm taka thawk tura chahin duhsakna a hlan bawk.

He hunah hian duhsakna leh in lawmpuina thu te sawi niin, Department aiawhin official ten pangpar an hlan a, Office holders, Heads of Departments leh MJA hotuten an telpui bawk ani. Heti hian LADC hnuaia Executive Member awm thei tur zat pakua chu hnawhkhah kim ani.