GOVERNOR IN LAI AUTONMOUS DISTRICT COUNCIL A TLAWH
Vawiin January ni 24, 2019 khan Mizoram Governor Shri. Kummanam Rajasekharan chuan Lai Autonomous Disrict Council tlawhin hetiang hian hun hman ani.
Chief Executive Member’s Office kawtah Mizoram Governor Pu Kummanam Rajashekharan puala lawmna inkhawm buatsaih ani a, SSA Pipe-Band ten National Anthem an tuma, Central YLA Choir-in Governor lawmna hla sa in Art & Culture Department, LADC ten Lai Hnam lam ‘Pawhlohtlawh’ an entir bawk ani. He Lai Hnam lam hi Governor Pu Kummanam Rajashekharan chuan a lampui ve nghe nghe ani. Pu T. Zakunga, Chief Executive Member, LADC chuan, Governor lawmna thu sawiin nikum, 2018 July 19-a Raj Bhavan meeting-a LADC tlawh tura an sawmna tihlawhtlinga Mizoram Governor zahawm takin hun chep tak kara LADC a rawn tlawh chu rilru leh thinlung taka a lawm thu a sawi a, Governor-in LADC a rawn tlawh chuan Lairam tan rah tha tak a chhuah ngei a beisei thu a sawi a. Nikum lama Raj Bhavan meeting-a Governor thurawn angin Revenue generation lama LADC in hma a sawn thu sawiin Finance & Accounts Department tan Office building hran LADC thawhchhuah ngei atanga sak tuma ruahmanna engkim peihfel anih tawh thu a sawi a, Mizoram Governor hi lungphum (foundation stone) phum sak turin a sawm a, Governor hian lawm takin a Finance & Accounts Department building sakna tur foundation stone hi a phum a, hemi hnu hian CEM Office kawtah state tree 'Herhse' thing a phun bawk.
Governor chuan nikum lamah rawn kal aduh viau laiin Mizoram election te anih avangin a duh hunah arawn kal thei lova, tunah hun remchang neia alo kal a, LADC thawktute hmel hmu in, Hnam Lam te nena an lo dawngsawng chu lawmawm atih thu a sawi ani. Lawngtlai District chu KMMTTP avangin hmun pawimawh taka la ni dawn tih tarlangin, lo inbuatsaih chho zel turin kalkhawmte a chah ani.
He Governor puala vantlang inkhawm hi, LADC Executive Secretary charge la mektu, Pu L.Z. Tluanga’n lawmthu sawina-in a khar ani.
*Official Meeting* : Vantlang inkhawm neih anih zawh hnu hian Governor hian Chief Executive Member Conference Hall-ah LADC Office Holder leh Head of Department-te Official Meeting a neihpui leh a. He meeting hi, LADC Executive Secretary charge la mektu, Pu L.Z. Tluanga’n a kaihruai a. LADC hnuaia Department hrang hrangte hnathawhdan leh LADC chanchin tlangpui Powerpoint Presentation hmangin GAD leh Planning & Programme Implementation Department ten felfai takin an pe ani. Governor chuan Department hrang hrang hmalaknate chu lawmawm atih thu sawiin tan la sauh sauh turin a fuih ani.
Lawngtlai By-Pass Road chungchanga thil awmdan a bulthum atanga sawilan niin, he hna a huna zawh a nih theihlohna chhan ah hian LADC-in MoU a sign pui Hindustan Steel Works Construction Ltd. Kolkata ten an tihtur an tihtawkloh vang niin a hria a, he hna hi chak taka bawhzuia a huntaka zawh ngei anih theihnan Deputy Commissioner Lawngtlai chu Legal Notice hmangin emaw atul anga Hindustan Steel Works Construction Ltd. Kolkata te lo hriattir turin a chah bawk. Hetianga Lawngtlai By-pass Road chanchin chiang taka hrilhhriat anih hnu hian programme duanlawk anga a hmuna tlawh a tum pawh a cancell ta ani.
Governor hian LADC hotute leh official te hnenah harsatna hrang hrang thleng thin te thlirliam mai lova a sutkiandan kawng enge ni tih dap fo turin a chah bawka, Master Plan feltak siamin Project-te duanga Sorkar ah thehlut zung zung turin a chah a, chumi kawngah chuan theih ang anga hma a lakpui tur thu a sawi bawk ani.
Pu Laltlawmlova Chinzah, Executive Member-in elementary student te tana India ram hmun pawimawh te tlawh tura hma lakpui tura a ngenna chu Governor chuan rawtna feltak siam nise hma a lakpui tur thu a sawi bawk ani. Hemi chungchang ah hian Mizoram Governor Pu Kummanam Rajasekharan chuan national student tour-a kal tur thlandan chungchang ah Autonomous District Council huamchhunga chungchang ah hian Mizoram Governor Pu Kummanam Rajashekharan chuan national student tour-a kal tur thlandan chungchang ah Autonomous District Council huamchhunga zirlaite thlang ve thin turin Assam Rifles Director General a hrilh tawh thu a sawi ani. Governor chuan ADC te nen thla thum danah meeting neih thin anih tur thu sawiin a hmun erawh chu Aizawl leh Lawngtlai ahte ani ang tiin, Thingtlang lamte pawh a hmun ngeiah kalin an dinhmun zirchian ani anga an hmasawn dan tur ngaihtuah ho zel ani tur thu a sawi ani tih sawiin hlim taka thiltih hi a thupui ani a, hlimtlang takin hna thawkho theuh turin LADC thawktute a sawm ani.
Governor hi Pu Rodney L. Ralte IAS, Secretary DC&MA, Pu Lalngaihzuala PS to Governor, Pu Rex Zarzoliana ADC to Governor, Pu N. Chakhai DC Lawngtlai leh Pu Amit Goel IPS, Lawngtlai SP leh State Govt. hnuaia officer engemawzatin an tawiawm ani. Governor hian LADC hruaitute hnenah an mamawh leh harsatna te inthlahrung lova thlena, inpawh taka hma laho zel turin a sawm ani.
Meeting neih zawh hian Governor chuan College venga Lairam Christian Medical Centre building sak thar leh District Hospital te tlawhin chawhnu khan Aizawl panin a let leh ani.
Written and published by Collins Ngurnunchhunga, AI&PRO
