By Pu C. Lalmuanthanga, CEM LADC
A hmasa in vawiin Green LADC Day 2024 hmang tur a lo kal khawm zawng zawngte chibai ka buk a che u.
Pathian hruaina in kumin 2024 Green LADC Day chu kan lo thleng leh ta a. 1st August, 2014 khan Lai Autonomous District Council huam chhunga ramngaw chereu mek zel do let na atana hma la turin turin 'Green LADC Committee' chu din a ni a. Green LADC Day hi kum 2015 atangin Mass Planting neia hman tan a ni a.
Green LADC Day-ah hian Lai Autonomous District Council hnuaia Department, NGO's, Kohhran leh Pawl hrang hrang te'n Thingtiak kan phun thin a. Kumin hi Green LADC Day kum 10 kan hmanna a lo ni ta reng mai. Tunah chuan LADC anga programme pawimawh tak a lo ni chho ta a, Green LADC Programme hi tunah chuan Headquarters-ah chauh mumal taka hman thin ani a, hei pawh hi a tul angin LADC area pumpui a hman a nih theih nana ruahmanna siam pawh a la tul mai thei bawk. Green LADC Day-a kan hmalakna hlawhtling chho mek KMMTTP Road leh Mampui kawnga kan Thingphun han hmuh te hian a hlimawm a, khualzin vei vak tan a nuam em em tawh a ni. Hei hì LADC achievement ropui tak ani tih hria in vawiinah pawh thing kan phun turte nung ngei tura uluk takin kan phun theuh dawn nia. Green LADC programme hnuaia Thingtiak kan phun tawh zawng zawng hi 2772 Numbers a ni tawh a. Vawiin hian thingtiak 327 phun leh tura ruahman a ni.
Tunlai khawvel thiamna leh finna sang zelah kan ramin chak takin hma a sawn ve zel a. Sorkar hmalakna hnuaiah inkalpawhna kawngpui tha leh development infrastructure nasa takin a lo pung chho zel a. Hmasawnna lo kal mek hi ramngaw awmsa te hian an tuar a ngai fo thin a. Tin, population lo pung zel leh khawpui lo thang zel avangin pawhin kan ramngaw te kan nawr tawm ve zel a, heng avang hian atam thei ang ber thing kan phun a, hlawhtling ngei tura kan enkawl zui hi a pawimawh hle a ni.
Tin, Global Warming leh Climate Change avangin a kum telin khawvel a lum tial tial a, thal khua a lo ro a, nasa takin ram a kang thin bawk a. kan boruak a thianghlim lo tial tial a, kan tui hnate a kang chat mek zel a, tui thianghlim hman turah harsatna kan tawk chho mek zel bawk a ni.
Heng avang hian kan ramngaw awm chhunte kan humhalh a, a tam thei ang bera thing kan phun belh hi kan tih mak mawh a lo ni ta a ni. Tin, thing tiak phun ringawt hi a tawk lova, Pledge taking a kan intiam ang khan a enkawl zuina kawngah mawh kan phur theuh a ni tih kan hre reng anga, Department hrang hrangte pawhin mahni thingphun enkawlzui kan tum theuh dawn nia.
Green LADC Day 2024 hlim taka hmang turin duhsakna ka hlan a che u.
