LADC BUDGET SESSION 2019 TAN ANI

Lai Autonomous District Council Budget Session 2019 chu vawiin, Thawhlehni, March ni 26 khan LADC Legislative Secretariat, Session Hall-ah tan ani. LADC Budget Session hi Chairman Pu V. Zirsang'an kaihruaiin Session tan ani a. Pu T. Zakunga, Chief Executive Member leh House Leader chuan Sorkar kum thar, 2019-2020 April atanga July thlenga LADC Sorkar sum hmanlawk tura ruahman (Vote on Account) Cheng Nuai 6412.66 pharhin, 2018-2019 chhunga sum indaihlohna Supplementary Demand for Grants Cheng Nuai 2956.68 pawh House-ah hian a pharh bawk ani. CEM Pu T. Zakunga chuan Parliamentary election tur avangin Central leh State sorkar pawh vote of account-in an kal a, hemi avang hian Lai Autonmous District Council pawh vote on account in a kal angai ani tiin, tunah hian Budget puitling pharh a nihloh avangin hnathawna tur tamtak tarlan theih anilo ati. Budget vote on account hi naktip ni March ni 28 hian pass tura sawiho ani ang.

Hemi hnu hian official bill panga The LADC (Entry of Goods into Market Tax) Regulations 2019, The LADC (Entertainment Tax) Regulation 2019, The LADC (Establishment & Management of Elementary School Education) Regulation 2019, The LADC (Marriage & Divorce) Bill 2019 leh The LADC (Inheritance of Property) Bill, 2019 te House ah present niin, heng Bill tehi Budget Session neih chhung hian sawihova pass tum ani ang.

Hemi hnu hian kumin kum kalta chhunga boral, LADC a Chief Executive Member lo ni tawh Pu F. Manghnuna leh Executive Member lo ni tawh Pu Nabin Kusum Chakma te pualin hun hman ani a, hetah hian Members ten an chanchin sawina leh a sunna hun hman ani. Hemi hnu hian Chairman Pu V. Zirsanga chuan vawiin atana Session hun chu titawpin naktuk hian Session neih chhunzawm leh tur ani.

Lai Autonomous District Council Budget Session hian ni thum chhung awhin March ni 29, 2019 hian tihtawp ani ang.



written & published by
Collins Ngurnunchhunga
AI&PRO