Release Date: 2016-07-21 18:30:00
CEM FOOTBALL TROPHY CHAMPION COUNCIL VENG FC: - Kumin CEM Football Tournament chu kum dang zawng aiin Club khel an tam a. Tournament țan hma hauh atangin boruak pawh a lian hle ani. Club tin ten țan kan la a ni tih hai rual a ni lo. Club hrang hrangte hmasawnna hmuh tur a tam hle na in, club hrang hrangten țan la chhunzawm zel turin kan in chah duh a. Tun tum ah hian LDFA Registration Club 16 leh Eastern Zone atangin club 2 an rawn tel thei bawk a. Match 18 awmin Goal 58 a lut a. Yellow card hi mi 59 ten an hmu a, player te hnawhchhuah ngai khawp Red card hmu 11 an awm bawk a ni. Tun tum tournament ah hian Goal 6 khungtu Vengpui FC player Zonunmawia chu top scorer niin Best player ah 'The Great Wall of Lawngtlai-III FC' Thawngchunga thlan a ni bawk a. Best Goal Keeper atan Goal khat chauh chhuahtu Council Veng FC goal Keeper Malsawmsanga chu thlan a ni bawk. Fair play Award lawmman dawngtu te hi Vengpui FC an ni. Nimin Final Match ah khan Council Veng Fc te chuan Lawngtlai-III FC te chu Elvis-a leh Ramhlunmawia te goal khung hmangin 2-0 in hnehna an chang. CEM Football Trophy Champion dinhmun an lo a hauh tawhna chu an humhim leh ta ani. Champion Team te hian Medal, Trophy leh Rs 50000 an dawng a. Pahnihna hian Medal leh Rs 25000 an dawng bawk ani. Match Official te pawhin game an control hneh hle a, official te inpekna leh taimakna rah kan hmu a tih theih awm e. Lunglei lam atanga Official lokal te zahna chibai kan buk lo phal love. Fans te an pawimawhna hrechiangtu Lawngtlai-III FC te an fakawm hle ani.
