Release Date: 2018-07-18 18:30:00

LADC CEM LEH OFFICIAL TEN GOVERNOR NEN MEETING AN NEI Vawiin (19.7.2018) khan Mizoram chhunga Autonomous District Council-te nena a tahtawl te tea meeting neihna a hnuhnung ber chu Raj Bhavan-ah neih leh a ni a, hetah hian Lai Autonomous District Council nen meeting neih ani. Mizoram Governor Pu Kummanam Rajasekharan chuan Lai Autonomous District Council (LADC) hotute nena meeting chu a kaihhruai a, Governor Kummanam Rajsekharan chuan India danpuiin mipuite harsatna sukiang turin thuneihna sang tak min pe a ti a. Chung thuneihnate hmang chuan mi harsa berte dinhmun kan chawikan a ngai a ni, a ti. Hnathawhna tur sum kan hmuh te chuan a tum ram a thleng pha tur ani tiin, hmasawnna hna hmanga an harsatna sutkian dan kan ruahman a pawimawh a ni, a ti. Autonomous District Council inrelbawlna mumal leh rualkhai taka mawhphurhna sem te, a hun taka report thehluh leh midangte ngaihdan lak te chu a pawimawh tiin, Council hruaitute chu an mahni Council huamchhunga project thawh mekte chu neitu chanchanga a hmuna vil tur leh enfiah thin turin a chah a ni. Governor chuan kum kaltaa an sum lakluh tum (target) an tlin avanga a lawmpui thu sawiin, a aia tam an hmuh theih nana tang zel turin a chah bawk a ni. Meeting-ah hian Council chhunga hnaruak hnawhkhah chungchang te, Lawngtlai Bypass Road te, Higher Secondary School leh College-a science zirna awm lo te, bawlhhlawh sawngbawlna, skill development, value addition, food processing leh thildang pawimawh te an sawiho a. Ramri hrula khaw 10 chuangte chuan vawiin thlenga kawlphetha an la hmuh loh thu leh Myanmar atanga raltlanten zirlai naupangte zirna a tih khaihlak thu tarlan a ni. LADC Chief Executive Member Pu T. Zakunga leh a thawhpuite chuan Governor chu Lawngtlai Greater Water Supply Scheme hawn a nih thuai theih nan leh NEEPCO-in 635 Megawatt Chhimtuipui Hydro Electric Power Plant siam a tum chu chak zawka hmalakpui turin an ngen a ni. Governor hian an inkawmna ah engineering line a ngaihpawimawh thu sawiin Kerala-ah engineering athlawna zir theihna Institution a awm thu te sawiin heta zir duh tur naupang an awm chuan lo ngaihven turin CEM chu a chah bawk a, Lai Autonomous District Council hruaitute chuan a theih ang anga an bawhzui tur thu hrilhin Governor chu LADC hmunpui Lawngtlai tlawh tura sawmin Governor chuan a hun remchang hmasa berah tlawh a tum ang tih alo hrilh ani. Vawiina Governor hovin meeting neih ah hian CEM hi Pu LZ. Tluanga, Deputy Secretary (GAD), Pu T. Chalnghingluaia, Education Officer (M/S) leh Pu Thansiama Lawtlai, Asst. Planning & Development Officer, LADC ten an tawiawm ani. (Courtesy- DIPR with inputs from I&PR, LADC)