INFORMATION & PUBLIC RELATIONS DEPARTMENT,
Lai Autonomous District Council, Mizoram
No.41/2021-2022
CEM IN FAINA HAPTA HAWNNA HUN HMANPUI
Lawngtlai,the 2nd October 2021: Vawiin hian,India Hnam Pa M.K. Gandhi pianchampha phak puala kum tina buatsaih thin, Faina Hapta (cleanliness week) 2-8 October in kara hman tur chu Lawngtlai Bazar Venga Areopagy-ah hawnna hun hman ani a,he hun ah hian Lai Autonomous District Council (LADC)-a Chief Executive Member (CEM) Pu V. Zirsanga chu khuallian ni in, hun a hmanpui.
Pu V. Zirsanga chuan faina chu hriselna nena in zawm tlat leh khawtlang,Ram leh hnam ti mawia, thianghlimna a thlentu ani tih a sawi. Faina chu hmasawnna atana rahbi pawimawh tak a nih avangin faina chu ngaih pawimawh a tul a ni, a ti. Faina kawnga hma kan sawn theih nan, chhungkua khawtlang leh sawrkar kan pawimawh dan a in ang vek a,mahni In leh a vel atanga bul tana hma lak a tul thu a sawi. CEM, chuan Lawngtlai District hi Mizoram district hrang hrang zingah Faina lama a hnufual berte zing ami kan ni a. Mizoram sorkar leh LADC a Sanitation Department ten theihtawp chhuah a hma an lakna a zarah hma kan sawn chho ve zel a. Tun aia nasa a tan kan lak a, kan inzirtir nasat lehzual hi a pawimawh hle a ni. Thil engpawh hi a awm lohna hmuna a awm hian bawlhhawh a ni a, chuvangin kan awmna hmun apiangah engkim a hmun dik taka paih a, hnutchhiah a pawimawh a, chu chu Faina kawnga hma kan sawnna tur pawimawh tak a ni a ti.Mi entawntlak, chhungkaw changkang leh entawn tlak ni turin faina nunpui i tum theuh ang u, tiin kal khawmte chu a sawm a ni.
Faina hapta hawnnaah pual hun tawi hman hi Lawngtlai UD&PA-a District Project Officer (DPO) Pi TT Beikhaizi chuan kaihruaiin, Rev. R. Laldawngliana, UPC(M) chuan hunserh a hmang a. Pi VL Ramnunsangi,UD&PA Lawngtlaia District Manager chuan report pein, Pu C. Lalhruaitluanga,DIPRO kaihhruaiin faina thutiamna ( pledge) neih a ni. LADC-a Local Administration Officer Pu D. Huanneihmawia'n lawm thu a sawina hun a hmang bawk.
Kumin faina hapta thupui atan hian"Faina - Kan in leh a chhehvel atangin (Cleanliness - From our home and its vicinity)" tih chu hman a ni a.
Azadi Ka Amrit Mahotsav hma lakna atangin LADC Sanitation Department-a sanitation worker mi 35 (mipa 24 leh hmeichhia 11) hnenah chawimawina thuziak hlan a ni a. An zinga mipa thawk tha bera thlan Pu Vanlalzaua leh hmeichhe thawk tha bera thlan Pi Lalnunpuii te hnenah pawisa fai Rs 3000 leh Citation hlan a ni bawk.
Faina hapta hawnna hun hman zawh hnu anih hnu hian CEM chuan Areopagy chunga Sanitation Department site office a tlawh nghal ;Sanitation Department hotute'n Faina kawnga an hnathawhna a an harsatna leh mamawh te lo thlenin, CEM chuan an harsatna leh mamawh an thlente uluk takin a sawipui a. Sanitation department hotute chuan CEM chungah beiseina lian tak neiin an mamawh an thlen te hi a tih hlawhtlin sak ngei an beisei thu an sawi.
Written & Published by: I&PRO, LADC
