10th September, 2018:- Lai Autonomous District Council chuan a hnuaia employee zawng zawngte'n Lai tawng an thiam theihnan leh LADC official language anih ang ngeia Tawng pawh humhalh anih theihnan Lai Autonomous District Council (LADC) leh Association for Lai Language (ALL) ten thawhhona thuthlung an ziah angin thawhtanni (3.9.2018) khan Laica Winter Session chu LADC Conference Hall-ah Pu T. Zakunga, Chief Executive Member-in a hawng. 

Laica Winter Session inaugural fuction neihah hian LADC CEM Pu T. Zakunga chuan Laifa tlemte Lairam chhungah kan awm a, kan phu vang ni lova mahnia ro inrelna kan neih hi Pathianin kan Hnam min hmangaih vang a ni ati a, hei chen kan kal tawh a, kan thenawm Chakma leh Mara ten an Ram rorelna leh an Pathian biaknan an hnam tawng an hmang vek ani tih sawiin keini Laifate chuan Pathian biaknan pawh mahni tawng kan hmang thei lova, kan bo thui tawh lutuk a ni ati. Mi tamtak chuan mahni Hnam hial an lo zahpuiin Laifa nih an hreh a, hei hi thalo a tiin ngun taka kan inngaihtuah chian a hun tawh takzet ani ati. 

CEM chuan a sawi zelna ah ALL ten thahnem ngai taka kan hnam tawng promote an tumna kawngah an hnathawh a fakawm hle a, duhthusamin sorkar lamin tha thawh tam thei lo mah ila, hma erawh kan sawn hle tawh a ni. Kan hnam tawng thanchhohna tur hian tha thlah loa kan beih a ngai a ni ati a, mahni chauha hmalak a har avangin thawhhona te kan nei dawn a. He thawhhona hi taima leh tihtakzeta kan beih a ngai dawn a ni tiin, kan thawhhona hi a tam emaw a tlem emaw kan hnam damnan a kan hnathawh hi a hlawhtlin ngei theih nan theihtawp chhuah a tul a ni ati. 

Laica Winter Session hi class pawh 5.9.2018 atangin kal tan nghal ani a, kartin Nilaini leh Zirtawpni chawhnu ahte class kal thin tur ani a, Class neihna hmun hi SSA BRC Hall, Forest Department Conference Hall leh LADC Conference Hall-ahte neih thin tur ani.