[3:02 PM, 8/15/2020] Collins Ngurnunchhunga: LAI AUTONOMOUS DISTRICT COUNCIL IN INDEPENDENCE DAY A HMANG


Lawngtlai, Inrinni, August ni 15, 2020:  Vawiin khan a vawikhatna atan Lai Autonomous District Council chuan ama pualin Independence Day a hmang. He hunah hian Chief Executive Member Pu T. Zakunga chu khuallian ani. Autonomous District Council pathum, Lai, Mara leh Chakma Autonomous District Council te chuan kumin 2020 atangin Independence Day chu District Council ten mahni puala hman ve tawh ni se ti a rel angin hman tan ani. 


Khuallian chuan Hnam Puanzar pawtparhin Chibai a buk a, hemi hnu hian Zalenna ni atana thuchah a chhiarchhuak.  CEM chuan Laifa ten mahni a ro inrelna Sorkar kan nei chu kan vanneihzia sawiin vawiin ni ang hi Autonomous District Council te tan chuan ni chhinchhiah tlak leh hriatreng tlak a ni dawn ani ati. LADC Sorkar in kum 2019-2020 inkara hmalakna tlangpui sawiin heng zingah hian NITI AAYOG hnuaia khaw inkar kawng engemawzat siamthat leh kawngpui zauh te, Annual Plan Fund atanga LADC enkawlna hnuaia Division, Sub-Division leh Sub-Headquarters hmun cheithat leh siamthat te, NEDP hnuai atanga Thlanmual Intawm tur siam te, infiamna lama hmasawnna tur te leh Loneitute tana hamthatna tur te ruahman ani ati a. Hei bakah hian Zirna In thahnem tak sak thar leh thuamthat ani ati bawk.


CEM chuan MDC ten an Local Area Development Fund atana dah pawh kum 2020-2021 ah chuan tipungin Cheng Nuai 5 theuh ruahman ani ati a, heng bakah hian NLCPR, Tribal Sub Scheme leh Excluded Area Grant atangin ram hmasawnna tur ruahmanna engemawzat siam ani ati bawk. Central Service-a Laifa thalaite an luh theihnan committee din anih thu sawiin, hetiang lama zirlai te chu Financial Assistance to UPSC Aspirants hnuai atangin tanpuina tur sum cheng nuai 12 dahsak an nih thu a sawia, LADC in ama revenue hmuh ngei atangin Finance Secretariat sak mek anih thu a sawi bawk.


CEM Pu T. Zakunga chuan Hnam dang leh ram dang awpbehna hnuaia awm lova zalen kan nih avang chauha heng hmasawnna hna tehi nei thei kan ni tiin, Lairam mipui ten hei hi ngaihlu lehzual turin a chah ani.


Independence Day 2020 LADC in a buatsaih ah hian Executive office holders, ram hruaitu hlun te, political party hruaitute, Heads of Department leh Staff, NGO leh media ten an tawiawm tha hle. Hetiang bawk hian Mara Autonomous District Council leh Chakma Autonomous District Council-ahte pawhin vawiin khan anmahni pualin Zalenna Ni hi an hmang ve bawk ani. 


Chief Executive Member LADC Independence Day 2020 speech hi official website ah chhiar leh download theiha dah ani.



Written by

Collins Ngurnunchhunga, AIPRO

Photos - Lalchawiliana Chenhrang