He thawhhona thuthlung ah hian LADC aiawhin Pu H. Lalramenga leh ALL aiawhin Revd. EF. Sangchem ten an sign ani. MoU sign na hun Chief Executive Member's Office (CEMO) a hun hman ah LADC CEM Pu T. Zakunga chuan Laifa tlemte Lairam chhungah kan awm a, kan phu vang ni lova mahnia ro inrelna kan neih hi Pathianin kan Hnam min hmangaih vang a ni ati a, hei chen kan kal tawh a, kan thenawm Chakma leh Mara ten an Ram rorelna leh an Pathian biaknan an hnam tawng an hmang vek ani tih sawiin keini Laifate chuan Pathian biaknan pawh mahni tawng kan hmang thei lova, kan bo thui tawh lutuk a ni ati. Mi tamtak chuan mahni Hnam hial an lo zahpuiin Laifa nih an hreh a, hei hi thalo a tiin ngun taka kan inngaihtuah chian a hun tawh takzet ani ati.
CEM chuan a sawi zelna ah ALL ten thahnem ngai taka kan hnam tawng promote an tumna kawngah an hnathawh a fakawm hle a, duhthusamin sorkar lamin tha thawh tam thei lo mah ila, hma erawh kan sawn hle tawh a ni. Kan hnam tawng thanchhohna tur hian tha thlah loa kan beih a ngai a ni ati a, mahni chauha hmalak a har avangin thawhhona te kan nei dawn a. He thawhhona hi taima leh tihtakzeta kan beih a ngai dawn a ni tiin, kan thawhhona hi a tam emaw a tlem emaw kan hnam damnan a kan hnathawh hi a hlawhtlin ngei theih nan theihtawp chhuah a tul a ni ati.
Association for Lai Language (ALL) President Rev EF Sangcem chuan Lai hnam te insuihkhawmna tur atana hmalakna hrang hrang ten rah an chhuah te lawmawm a tih thu a sawi a. Tawng nei lo hnam chu hnama chhiar tlak an ni lova, an ral ngei ngei thin tih sawiin kan CEM zahawm takin kan hnam a bo lohna tura kan tawng promote nana nasa taka hma a la chu fakawm a tih thu a sawi bawk. Scheduled tribe list a kan hnam hming ziak dan leh kan Autonomous District Council hming ziakdan inang lo a ngaihmawh thu a sawi rualin hei hi a chhan pakhat chu kan tawng, Lai tawng kan hman loh vang a ni tih a sawi bawk.
LADC leh ALL te inremna ah chuan ALL te hian kum-nga chhungin kumtin thlathum chhung LADC employee te tan "Laiholh Cawnnak" (Lai Tawng Zirna) hun an buatsaih thin anga, zirna senso leh material te chu LADC in a tum anga, ALL ten Resource Person te an tum thin dawn a, hei bakah hian thawhhona thuthlung point pawimawh tak tak MoU ah hian ziahlan ani.
