Ni nga awh tur Lai Autonomous District Council Budget leh Fur Thutkhawm (Budget & Monsoon Session) 2019 chu vawiin July ni 24 (Nilaini) khan LADC Session Hall, District Council Secretariat, Lawngtlai-ah LADC Chairman Pu V. Zirsanga kaihhruaina hnuaiah tan ani.

Session hi Chawhma dar 10:30AM ah tan niin zawhna leh chhanna hun hman hmasak ani a, he hunah hian Lungtian Bialtu MDC Pu. Sanghuliana zawhna te sawihona neih ani.

Zawhna leh chhanna hun hman anih hnu hian Pu. T. Zakunga, Chief Executive Member leh House Leader chuan Kum 2019-2020 atana Budget Estimate chu House-ah a pharh a, kumin LADC Budget atana ruahman lawk dan chuan GSFC Award  ah Nuai 14,673, GIA to LADC ah Nuai 4,138.60, Local Revenue atanga sum hmuh beisei Nuai 210 leh V/C (MFC Grants) ah Nuai 232.34 niin, a vaiin Cheng Nuai 19,253.94 anih thu a sawi.

CEM chuan Kum 2018-2019 chhunga Sorkar sum indaihlohna (Supplementary demand for Grants) Cheng Nuai 2956.68 hmuh anih tawh thu sawiin hei hi LADC hnuaia thawktute 7th Pay Arrear atan Nuai 1999.85 leh hnathawhna atan Nuai 958.83 hman anih thu a sawi a, hemi bakah hian Demand-a langtel hmanlo RKVY matching share atanga hmuh leh hmanral tawh Cheng Nuai 1.90 chu House pawmpui turin a dil bawk ani. LADC Budget 2019-2020 hi July ni 30, 2019 hian sawihona neiin vote lak ani ang. 

CEM-in Budget a pharh hnu hian Pu. Laltlawmlova Chinzah, Executive Member i/c Middle Schools official Bill putlut 'The Lai Autonomous District Council Education & Human Resources Department (Group B & D) Recruitment Rules, 2019 chu sawifiahna neih niin Bill hi naktuk date 25.7.2019 hian sawihona leh vote lak ani ang. 

Hemi hnu hian Pu. V. Zirsanga chuan vawiin atana Session chu titawpin, naktuk ahun ngaiah tan leh tur ani.

Written by Collins Ngurnunchhunga, AI&PRO