Release Date: 2018-07-05 18:30:00

Mizo Hmeichhe Insuihkhawm Pawl (MHIP) din champha vawi 44-na, vawiina Central Young Lai Association (CYLA) Hall, Lawngtlai-a neih chu Pu H. Chhuanawma, Executive Member i/c I&PR, LAD etc. Lai Autonomous District Council chuan Khuallian niin a hmanpui. Khuallian chuan MHIP Sub-Hqrs. Lawngtlai ten Khuallian atana an hmang chu lawmawm a tiin an pawl din champha Vawi 44-na an hmang thei chu duhsakna a hlan ani. A sawi zelna ah MHIP Sub-Hqrs. Lawngtlai ten an activity report-a an hmalakna an tarlante leh an hnathawhte chu ropui a tiin Lawngtlai District chhunga hmeichhiate hmasawnna tur mai bakah midangte tanpuina kawnga an thawh hlawkzia chu lawmawm ati a, thawhrimna leh rinawmna chu Ram leh Hnam dinchhuahna ani tih a sawi bawk. Pu H. Chhuanawma chuan inchhungkhur ah Nu leh Pa ten mawhphurhna nei ve ve mah se Nu tehi inchhungkhur enkawltute leh fate enkawlna kawngah an pawimawh lehzual ani tih sawiin an dinhmun hi Pa te aiin a hniam biklo ani ati a, tunlai changkanna leh hmasawnna thang zelah hmeichhia ten kawng tinreng ah hma an sawn nasa hle tih sawiin chutih rualin inchhungkhur ngaihsak tlat turin a chah a, chhungkaw hlim leh nuam tak chu Nu te atanga lo intan ani ati a, MHIP Sub-Hqrs. Lawngtlai chu hmalam pana an kal zelna turah duhsakna a hlan a, hemi rual hian an pawl din champha pualin lawmpuina thilpek a hlan bawk ani. MHIP din champha lawmna ah hian Pu H. Chhuanawma chu I&PR Department atangin I&PRO, AI&PRO te leh Local Administration Department-a staff engemawzatin an tawiawm a, he hunah hian awareness te ngaihthlak niin zai, lam leh lemchan te enin hun hlimawm leh hlawhtling tak hman ani. Written & published by Collins Ngurnunchhunga, AI&PRO 06072018-1800