Inrinni (25.8.2018) khan Govt' Lawngtlai College Week kharna CYLA Hall ah neih niin, Pu. C. Lallungmuana EM i/c Sports & Youth Services etc. in khuallian niin hun a hmanpui. Khuallian Pu. C. Lallungmuana chuan vawiin a zirlai te chu, an vanglai hun a ni tih sawiin, Pathian in vanglaini chen min phal a, mahse, Pathian duhloh zawng erawh chuan vanglaini hi kan chen tur a nilo a ti. Sports hi mi tam takin eizawnna atan an hmang tawh a, eizawnna piah lamah taksa hriselna atan thil tangkai tak a ni a, chuvangin insawizawi hi i uar zel ang u a ti a, Pu. Muana chuan Kan rama Zirna In kan neih san bera zirlaite inni a, hlawhtlinna nei turin tumruhna, huaisenna leh taimakna nun kan neih a ngai a ni. Kei ngei pawh hi dinhmun harsa tak atangin theihtawp ka chhuah ve thin a, Pathian malsawmna changin tun dinhmun hi ka thleng thei a ni. Chuvangin, vawiin a zirlai duhawm tak tak lokal te pawh hian, tumruhna, huaisenna leh taimakna nena thiltihnaah kan beih tang tang chuan, hlawhtlinna kan chang ngei dawn a ni a ti. Khuallian chuan, Innghah ngamna zirlai kan nih a ngai a, innghah ngamna ni tur chuan, kan intodelh hmasak a ngai a ni. Chutiang rilru pu tur chuan ka chah duh che u a ni a ti a. Zirlaite chu ram nghahfak an ni tih inhre tur a chahin, thahnemngaitaka zir turin a chah.