PR No.10/2024-2025.

LAWNGTLAI, May 17, 2024: Vawiin chaw hma Dar 10:30 AM hian, Pu VL Hmuaka, Chairman kaihhruaina hnuaiah, Lai Autonomous District Council (LADC) Session neih a ni a, he Session-ah hian Pu C. Lalmuanthanga, CEM LADC chu, Government of Mizoram Notification-in a phut angin, LADC Session-ah Vote of Confidence nei tura atih a ni. Vawiin hian Vote of Confidence hi neih a ni a, Pu VL Hmuaka, Chairman LADC chuan, the LADC (CCB) Rules, 2010 Rule 21, Sub-Rule 2 in a sawi ang leh Rule 69, Sub-Rule 3 in thuneihna a pek angin Vote of Confidence chu Pu C.Lalmuanthanga chuan a paltlang tih a puang.

Pu C. Lalmuanthanga, Chief Executive Member (CEM) chuan, thusawina neiin, LADC sorkarin harsatna tawkin thlahnih (2) zet mai Sorkar mumal nei lovin hun kan hmanga, Pathian kaihruainain Kohhran-te leh mi thahnemngaite tawngtaina zarah, keini United Legislature Party-te chuan Sorkarna kan lo siam thei ta hi ka lawm tak zet a ni, a ti.

A sawizel naah, United Legislature Party-ah hian ram hruaina kawngah mi Senior leh fel tak tak an awm laia, duhsak taka House Leader ni tura min thlang hi ka lawm tak zet a, phu lo pawh ka inti hle a ni. Tin, he Sorkar a pian theih nan hian chhuanlam engmah siam lovin Dr. Hari Babu Kambhampati, Honourable Governor of Mizoram leh Mizoram Chief Minister zahawmtak, Pu Lalduhoma te chuan awlsam takin approval min tihfel sak thuai a, an hnenah lawmthu ka sawi duh ani a ti.

LADC Sorkar Budget hi a beitham hle a, chuvangin, kan ram leh hnam tan hian theih tawpchhuahin hma lak kan tum dawn a, hmun dang leh Revenue collection atangin sum tam zawk thawh chhuah kan tum ang, chutiang tur chuan thawhhona tha tak nen hmala ho turin ka sawm che u a ni, a ti bawk.

Pu C. Lalmuangthanga, CEM LADC chuan, he kan Sorkar-ah hian intluktlang thei ang berin hma lak kan tum anga, kan hmalakna tur kawng hrang hrangah te mipui leh ram leh hnam tana ka thawhpui zawng zawngte’n min tawiawma min support tlat turin ka sawm che u a, kan ramah hian hmel danglam (change) atha zawngin thlen tir ngei kan tum dawn a, a ti.

“He rorelna hmuna ka thawhpui Opposition-te pawhin, ram leh hnam tana tha tur ni a kan hriatte chu, in thlahrung miah lovin, rawn lenga thurawn min pe thin tur leh kan ram leh hnam tan kan theihna sang ber hmangin, theih tawpchhuah a, tanla theuh turin ka sawm che u a ni,” tiin Pu C. Lalmuangthanga chuan a sawi.

Vawiin Session-ah hian, Pu Sanghuliana Mualchin, Deputy Chief Executive Member (Designate), Pu V. Zirsanga MDC/Ex-CEM leh Pu T. Zakunga MDC -Ex- CEM LADC-te pawhin thu an sawi bawk.

Pu VL. Hmuaka, Chairman LADC chuan, Vote of Confidence tluang taka neih a nih avangin lawmthu sawina a neih hnuin, tiamchin awm lovin Session ati tawp a ni.

Written & Published by: I & PR Department LADC Lawngtlai