PR.No.49/2024-2025.
Lawngtlai, August 9, 2024: Hi caan ah hin, Pu C. Lalmuanthanga, CEM nih cun bia a chim i, fimthiamnak sangchin ngei ding in ai zuam cuahmah liomi Shillong um Laifa cawng liomi hna cu an fimthiam cawnnak ah teirial in zaanghlei cawi ding an sinak kong le Lai Miphun muihmai a langhnak an sinak kha hngal peng buin a lamkip in nunzia khuasak zong ah ralring te in an um a herh tiah bia a riah hna. Lai Miphun an sinak kha zahpi lo in Lai thluak ah hin hawi hlei in thiam khawhnak le cungcuan khawhnak a um ti kha langhter peng ding in le an cawnnak zong ah Miphun dang nih zohchomi si kho ding i aa zuam chin ding in forhfialnak bia a chimh hna.
Pu C. Lalmuanthanga, CEM nih hin Siangngakchia hna cu Ram le Miphun nih zohthlakmi an sinak le Lairam le Lai Miphun damnak le a chiat a ṭhat ah hmailei caan ah an liang ah ṭuanvo nganpi ai khinhnak kong le teimanthlu tein ca an cawn kha atu thok in Lai miphun caah san an tlaih ve khawhnak an langhternak a sinak kong le Cawng liomi siangngakchia hna cu an nu le pa lawng nih an lak ah hnabeiseinak an ngei lo i Lairam le miphun nih hngahngan ngaiin a cuanh peng hna tiah a chimh fawn hna.
LADC cozah nih a si khawhchung in siangngakchia hna zawnruat in hmailei caan zong ah a zuampiak peng hna lai nakding kong zong a chim.
Pu C. Lalmuanthanga, CEM hi Pu Lalropuia Chinzah, EM, Pu HC. Lalthawmliana, EM hna pin ah Pu H. Lalmuansanga, Dy. Chairman hna nih an zulh i, hi LADC caah a biapi ngaingaimi hna hi thaizing hin North-East India Autonomous District Council haotu hna i tonpumhnak ding Tripura Castle, Shillong-ah aa tel ding an si.
Pu HC. Vanlalchhuana, Superintendent, Lai Hostel, Shillong nih cun, LADC hruaitu hna nih a veh hnanak ah le an herhmi tete zong hun tlamtlinh piak an i timhnak ah lunglawmhnak bia a chim.
Written & Published by; I & PR Department, LADC Lawngtlai
