PR. No.29/2024-2025.
Lawngtlai, July 16, 2024 hian, Pu C. Rongura, Executive Member, Art & Culture Department, LADC chuan a Department chan, Art & Culture Dept.-te chu, a room-ah meeting a neihpui.
Pu C. Rongura, EM chuan thusawiin, Pathian leh kan hotute duhsakna avangin, Pu C. Lalmuanthanga, CEM, LADC kaihhruai Sorkar-ah, Art & Culture Dept. enkawl turin min ruat a, ka la enkawl ngai loh anih avangin, thawktute nen tan kan la ho ang a, hmasawnna rahbi thar neih ngei I tum ang u. Sorkar-in Office kai-hun a ruatte pawh zawm hram hram ila, Lai dress hak hun tura, ni ruatbik kan neihah pawh hak hram i tum ang u, a ti.
Pu C. Rongura, EM chuan, Pathianin LADC min pekchhante zinga pawimawh tak chu, Art & Culture Dept. hi a ni hial awm e, Pathianin hnamah min din a, kan ram leh hnam hi aral loh nana hmalatu tur chu keini Dept. hi kan ni. LADC Sorkar kan nei thei hi kan vannei hle a ni, tih hi i hre thar leh ang u, kan hun chhung chu a reilo mahse, kan sum neih ang angte dik leh felfai taka hman kan tum anga, kan ram leh hnam tan hian, rohlu hlu tak hnutchhiah hman turin, hnathawh kan tum ngei tur a ni, a ti bawk.
Pu J. Sangthangpuia, Art & Culture Officer pawhin thusawiin, Art & Culture Dept. pawimawhna leh Dept. in hmachhawp a neihte leh hmalakna tlangpui sawiin, harsatna Dept-in a neihte sawiin, hma an sawn theih nana tan lak a ngaih dante a sawi bawk a ni.
Pu C. Chawnthangpuia, Librarian pawhin, Library chungchanga thil pawimawhte leh Dept. tana hmalakna tur pawimawhte a sawi a, Staff atang pawhin thusawina ngaihthlak a ni bawka, inkawmhona hlimawm tak neiin, thingpui an in ho a ni.
Written & Published by; I & PR Department LADC Lawngtlai
