Lawngtlai District chhunga a hmasa ber tur, Phawngpui Primary Agriculture Credit Society (PACS) chu nimin chawhma khan LADC CEM Pu. T. Zakunga chuan South Lungpher  khuaah a hawng a, MCAB Chairman Pi T. Lalmuanpuii leh MCAB a hruaitu pawimawh ten he hun hi an hmanpui.  Pu T. Zakunga chuan, Lawngtlai District a cheng mipuite chu, sum khawlkhawm lamah kan hnufual hle a, sum  dehchhuah mil zela khawsak thiam zir a pawimawh a ni tiin, District mipuite'n sum khawlna tur Bank tlachham taka kan awm laia, kan kawtkai maia Bank chhawr tangkai theih tura chhawpchhuahsak kan ni chu ram, mipui leh khawtlang hmasawnna atana rahbi pawimawh tak a ni a, hei hian mipui tam zawk leh kuthnathawkte harsatna tawh thin a sutkian ngei a beisei thu a sawi. He hun kaihruaitu MCAB Chairman, Pi T. Lalmuanpuii pawhin "Phawngpui Primary Agriculture Credit Society, South Lungpher chu Computerised tura thlanchhuah anih thu a sawi a, thawhchhuah ang angte tangkai leh awmze nei zawka hman hian hmasawnna a thlen zawk a, awhna ruama mipuite kan tlukluh loh nan sum enkawl leh hman dan, chhungkua atanga inzirtir theuh turin kalkhawm te a chah. 

Phawngpui Primary Agriculture Credit Society hi MCAB  hnuaia din niin, thingtlang lo neitute sum khawl tipung tur leh an thawhchhuahte awmze nei taka an khawl theih nana tanpuite, kuthnathawktu ten thlai chi awlsam leh tlawm zawka an neih theih dan ngaihtuahte, an tharchhuah hralhna kawnga harsatna an tawh lohna ngaihtuah puite leh khawtlang hmasawnna ngaihtuah a, intodelh tura kawng zawn te chu an thiltum zingah a tel a ni.