ON 14th MAY, 2024@11:30AM AT LADC HALL.


Pu Chairman,
Pu VL. Hmuaka, Chairman LADC, Dr. Lorrain Lalpekliana Chinzah, Adviser to Chief Minister, Pu Robert Romawia Royte, MLA, Pu C.Ngunlianchunga, MLA, Pu Zodintluanga Ralte, Ex-Minister, Pu H. Biakzaua, Ex-MLA, United Legislature Party-a ka thawhpui, ULP Deputy Leader, Pu Sanghuliana Mualchin, Kan CEM kalchhuakta Pu V. Zirsanga, ULP-a ka thawhpui MDC zawng zawngte, Pu Cheemala Siva Gopal Reddy, DC Lawngtlai, Hunserh min hman saktu, Rev. B. Zazawna Lai, Political Party hrang hrang hruaitute, NGO hrang hrang – CYLA, LWA, MJA, MHIP, LSA, LDSA, VC Association, LADC Officers Association leh Staff Association, LUP, MUP hruaitute, LADC hnuaia thawk Officers leh Staff zawng zawngte leh vawiina helai hmuna rawn kalkhawm zawng zawngte, a hmasain zahna chibai ka buk che u a, in hun hlu taka senga he programme min rawn hmanpui avangin in zavaia chungah lawmthu ka sawi a ni.
Vawiina kan hun hman mek, “CEM lakluh inkhawm” hi ram danpui hnuaia sorkar ni serh pawimawh berte zing ami a ni a. Party politics kaihhnawih lam han sawi chiamna hun niin ka hre lova thu tam tak sawi ka tum lo. Vawiin nia ka han sawi duhte chu a tawi zawngin hetiang hian han sawi ta ila :
A hmasa berin lawmthu sawi tur tam tak ka nei a. Kan hriat theuh angin LADC-ah sorkar thar siam turin MNF leh INC-in Thawhhona Thuthlung siamin United Legislature Party kan din a. Chu ULP chuan ka chungah duhsakna nasa tak lantirin House Leader atan hial min thlang a ni a. ULP-a ka thawhpui MDC zingah kei aia experience nei tha tam tak an awm laia CEM dinhmun luah tir ka han ni hi thildang vang a ni lo, Pathian malsawmna leh ULP-a ka thawhpuite duhsakna vang liau liau a ni tih ka hrechiang khawp mai. Pathian leh ULP-a ka thawhpuite chungah rilru leh thinlung takin lawmthu ka sawi a ni.
Tin, ULP anga MNF leh INC kan thawhhona a hlawhtlina LADC-ah sorkar ngelnghet a awm theihna tura hma min lak saka sul min sut saktu : MNF Party leh Congress Party-a District leh Headquarters-a hruaitute chungah lawmthu ka sawi takmeuh a ni. Tin, Democratic principle ngai pawimawha ram danpui chhunga dik leh fel taka thil kalpuia a hun taka sorkar thar pawmpuina min petu : Honourable Governor of Mizoram, Dr. Hari Babu Kambhampati chungah lawmthu ka sawi a ni. Tin, Mahni party nih loh avanga thinhrikna nei hauh lova rilru zau leh ‘Pa chanchang’ taka LADC Sorkar thar siamna kawngah dodalna leh harsatna engmah min siam sak lova LADC Sorkar thar min pawmpuitu Mizoram Chief Minister zahawmtak, Pu Lalduhoma chungah rilru leh thinlung takin lawmthu ka sawi bawk a ni.
Contd…next page
May 10 (Zirtawpni)-ah Aizawl atangin kan rawn haw a. Ka chungah duhsakna nasa tak lantira min lawmpuia min lo hmuaktu, MNF party leh Congress Party mipuite chungah rilru leh thinlung takin lawmthu ka sawi bawk a ni. Khang thilte kha ka phu hauh loh Party mipuite duhsakna leh lainatna liau liau a ni a, ka lawm takzet a ni. Tin, hun hlu tak senga vawiina he hun hmanga helai hmuna lo kal khawm zawng zawngte, Lawngtlai khawpui chhung mai nilo, Aizawl lam atanga lokal MNF leh Congress Party-a kan hruaitu zahawm tak takte, veng hrang hrang atanga min duhsaktu thenrual tha leh chhungkhat laina vawiina min tawiawmtute leh ka bial, South Lungpher leh Siachangkawn atanga lokalte chungah lawmthu ka sawi a ni. A hun taka CEM appointment order a chhuah theihna tura theih tawp chhuaha a tul apiang umzuitu ULP-a ka thawhpuite leh Lai House-a DRC leh a staff-te chungah lawmthu ka sawi bawk a ni.

Thu tam tak sawi ka tum lova ka han tarlan hram duh chu, Mipui Sorkar langtlang takin kalpui kan tum dawn tih hi a ni : Vawiin nia kan sorkar din hi Party 2-te inlungruala kan din ni mahse party 2-te tan chauh a ni dawn lo. Lairam mipui huapzo sorkar din a, langtlang taka kal kan tum dawn a ni. District Council hi a dinhmun diktak kan thlir chuan ram hmasawnna hna hrang hrang thawk turin tih theih a tlem em em a ni. LADC Budget atang hian 92% vel hi thawktute hlawh atan kum tin hman a ni thin a. A biktakin infrastructure lama hmasawnna hna thawh a harsa em em a ni. Central Sorkar leh State Sorkar atanga kan sum dawn ang angte dik leh langtlang taka kan hman a ngai a. Kan theitawpa thawhchhuah ve kan tum pawh a hun ta hle. District Council angin sum thawhchhuah (revenue generate) a harsa hle mai a. Amaherawhchu, Pathian zarah Sorkar fuke kima kan kal hun chuan revenue tam zawk generate turin theihtawp chhuah kan tum dawn a ni. Hemi kawngah hian Lairam mipuite tawiawmna leh thawhpuina ka ngen takmeuh a ni. Vawiin nia MNF leh Congress party-ina sorkar a siam hi mipui sorkar, langtlang sorkar, tumah lal bik leh thunei fal bik awmlohna sorkar, engkim intluk tlang leh inkhai rual taka kalpui sorkar ni turin theihtawp chhuah kan tum dawn a. District Council chhunga sum leh pai tlemte te hi daihzai khairual leh renchem taka hman kan tum dawn a ni. Chang tam bik leh chang tlem bik awm lovin, “sem sem dam dam ei bil thi thi” tih principle-in kalpui kan tum dawn a ni.
Sorkar ngelnghet leh langtlang tak kan dina Lairam leh hnam tana lungrual taka hna kan thawh theih nan, Lairam mipui zawng zawngte, Kohhran, NGO hrang hrang, Press mite leh he LADC chhunga thawktu zawng zawngte he sorkar hi thurawn min pe a, min finchhuaha min tawiawm tlat turin ka sawmin ka ngen takmeuh che u a ni e.
Awle, United Legislature Party-in lungrual taka a lo thlan chhuah tawh angin ka thawhpui, Deputy Chief Executive Member atan Pu Sanghuliana Mualchin, MDC 5 : Lungtian Constituency chu ka ruat (designate) tih ka puang e.

In zavaia chungah ka lawm e