PR No.7/2024-2025.
Lawngtlai Dt. 14th May 2024: Vawiin chhun dar 11:30AM hian LADC-a United Legislature Party (INC+MNF) hruaitu Pu C. Lalmuanthanga, Member of District Council, 6-South Lungpher Constituency atang a thlan tlin chu, Dr. Hari Babu Kambhampati, Governor of Mizoram-in, Lai Autonomous District Council, Chief Executive Member atan Approval a pek tak avangin, Dt.14th May, 2024 hian, Pu Cheemala Siva Gopal Reddy, Deputy Commissioner, Lawngtlai chuan LADC Conference Hall-ah rinawmna thu tiam tirin, Chief Executive Member atan a la lut.
Pu C. Lalmuanthanga, Chief Executive Member, LADC chuan thusawiin, kan hriat theuh angin LADC-ah sorkar thar siam turin MNF leh INC-in Thawhhona Thuthlung siamin United Legislature Party kan din a. Chu ULP chuan duhsak takin House Leader atan min thlang hi ka lawm hle a. ULP-a ka thawhpui MDC zingah kei aia experience nei tha tam tak an awm laia, CEM dinhmun luah tir ka han ni hi thil dang vang nilovin Pathian malsawmna leh ULP-a ka thawhpuite duhsakna vang liau liau a ni tih ka hrechiang khawp mai. Pathian leh ULP-a ka thawhpuite chungah rilru leh thinlung takin lawmthu ka sawi a, tin, Democratic principle ngai pawimawha ram danpui chhunga dik leh fel taka thil kalpuia a hun taka sorkar thar pawmpuina min petu : Honourable Governor of Mizoram, Dr. Hari Babu Kambhampati chungah lawmthu ka sawi a. Tin, Mahni party nih loh avanga thinhrikna nei hauh lova rilru zau leh ‘Pa chanchang’ taka LADC Sorkar thar siamna kawngah dodalna leh harsatna engmah min siam sak lova, LADC Sorkar thar min pawmpuitu Mizoram Chief Minister zahawmtak, Pu Lalduhoma chungah rilru leh thinlung takin lawmthu ka sawi bawk a ni, a ti.
A sawi zelnaah, he Sorkar hi Lairam mipui huapzo leh langtlang Sorkar ni tura kalpui kan tum dawn a. Central Sorkar leh State Sorkar atanga kan sum dawn ang ang te dik leh langtlang taka hman kan tum ang. Tin, District Council angin sum thawhchhuah (revenue generate) a harsa hle mai a. Nimahsela, Pathian zarah Sorkar fuke kima kan kal hun chuan revenue generate turin theihtawp chhuah kan tum dawn a ni. Hemi kawngah hian LADC a thawktute leh Lairam mipuite tawiawmna leh thawhpuina ka ngen tak meuh a ni. District Council chhunga sum leh pai tlemte te hi daihzai leh renchem taka hman kan tum dawn a. Chang tam bik awm lovin, "Sem sem dam dam ei bil thi thi” tih principle hmangin kalpui kan tum dawn a ni.
Pu C. Lalmuanthanga, Chief Executive Member, LADC chuan thusawina a neih hnuin, Sorkar kut-ke a kim hma, Executive Body a pian fel hma-a a thawhpui turin, Deputy Chief Executive Member atan Pu Sanghuliana Mualchin, MDC 5-Lungtian Constituency chu a ruat (designate) nghal ani
Swearing-in-Ceremony of Chief Executive Member, Lai Autonomous District Council hun hi, Pu K. Lalthanzara, Executive Secretary, LADC chuan kaihruaiin, Government Notification a chhiar chhuak a, Rev. B. Zazawna Lai, GS-LIKBK in hun serh a hmang bawk. He hunah hian Dr. Lorrain Lalpekliana Chinzah, Adviser to Chief Minister, Pu C. Ngunlianchunga MLA, Pu Robert Romawia Royte MLA, Zodintluanga Ralte Ex-Minister, Pu H. Biakzaua, Ex-MLA te, LADC Official-te leh sawmbikte an tel tha hle. Hemi hnu hian, Pu C. Lalmuanthanga CEM, LADC chuan a room luah nghalin lawmpuitu leh tawiawmtu an thahnem hle bawk.
Written & Published by: I & PR Department LADC Lawngtlai.
